Zino Davidoff 1986 Eau de Toilette

So, den Kommentar schreib i wiagle "dschast for fann" weil i des mit dem boarischen Blog von da Hasi zu oam vo meine "Rievjus" dodal pfundig gfundn hob. Koa Angst, a wengal wos vazoi i eich scho von dem Burschen do.

Man muaß nadiale a wissen, dass des immer so a Sach is, wenn ma im Dialekt schreibt, weils do ja koa wiagliche Rechtschreibung ned gem duad. I schreibs hoid auf mei Art - aus Niederbayern kimm i.

Ihr kinnts do a a boa boarische Spezialausdrücke lerna, oiso doads d'Augn weid aufsperrn.

Lang hob en missachtet den Zino do. Friahra war ma der imma vui z'oidmodisch und so. I hob ja ganz lange Zeit wiagle nur auf babbsiaße Duftwassal gstandn, des gib i ganz ehrle zua. Oba vor a boa Monat hob i des Flaschal do beim "Pferdlma" im Regal gsegn. Des war recht groß und überhaupt ned deia. Deswegn hob i dann glei zuagschlong. Sakrament, hob i mi gfreid, des kann i eich fei scho song.

Dahaom hob en glei amoi sauba draufgspritzt, eam do. Mei, irgendwie is a scho a weng a Gschwoischädl. Oiso er drogd hoid scho dick auf, dad is song, oiso hob i gmoand. Und Greizdeife namoi na, hod mi des Zeig dann in da Nosn gstocha. Mi hods so dermaßen g'reid, dass i an Zino kauft hob. Überhaupt nimma hod a ma gfoin, wia a do so auf meiner Haut umanandazinot hod, vakaufa woid i eam dann wieder, i Hirsch. Oba so noch und noch hamma uns agfreind, da Zigarren-Charly und i. Grod sche is gwen, weil er meim Nasal dann doch recht gschmeichlt hod.

Oba dann hod se rausgstoid, dass am Davidoff sei Zinerl doch a weng a Grischberl is, bei mir zumindest. Recht gschamig hod er dann do und bis heid draud er se ned so recht, amoi richtig de Sau raus zum lossn, der Gletznbeni. I frog mi, wos der nur hod bei mir. Olle andern song immer, dass der volle Brezn neihaud und so. Dabei hob i mi mittlerweile total an eam gwohnt und hob na sogar ins Herz gschlossn, den Haumdaucher.

Ja, a Haumdaucher is des, weil a nix aushoid. Do mechst amoi so richtig männlich vor di hidunstn und dann geht do nix. Na wiagle, des is koa Grampf! Da Zino der is bei mir total zurückhaltend. Der duad doch nur so, oder? Huifts ma bitte! Vielleicht mog der ja koa boarische Haut ned. Oder is der am End' einfach a recht a Lump, ha? I woaß des echt ned.

Naja, mir is des irgendwie a wurscht. I mog des trotzdem des Zeigl do. Iatz bin i endle koa Hosnbiesler nimma und drau mi an so a Wassal ane wia an des do, dann gib i do a ned so leicht auf. Zino, i kauf di wieder, host mi? I hob zwar meine 125 ml - oder san des 150? - innerhalb kürzester Zeit scho fast verbraucht, weil i dermaßen dieseln muaß, oba es huift ja ned.

Des riacht, wia wann de oana ogschissn und obieslt hätt, schreibt do unten oane. Des dad i fei so ned song. Guad, a weng unangenehm is der Bursche do am Anfang scho, oba der wird mit da Zeit wiagle total zuadraule.

I dad des so song: Du spiast di mit ana guadn Zigarrn in am frisch butztn Klo ei, dampfst sauber los und gehts dann länger nimma raus. Danoch riachst so. Is doch recht gschmackig, oder? I find scho.

Iatz werdn nadiale de Gscheidhaferl wieder song, dass mei Gschreibslad do koa hilfreicher Kommentar is, oba des macht mir gar nix. I entschuldig mi nur bei dem "Naaase" do unter mir, weil der echt einen Mega-Text rausghaud hod und meine Sentenzen stengan iatz über de seinigen. I hoff, des duad da Aufmerksamkeit für den subba Kommentar koan Abbruch. Nix für Unguad!

Iatz her i oba wieder auf, weil i ja so wie so koane Kommis mehr schreim woid. Des do hod mi allerdings dodal g'reizt!