Oriens Van Cleef & Arpels 2010

„Ha des isch abr a schees Töpfle“, han i denkt – „des dät mir in meim Vitrinle au no gfalla“ – „Das hat Van Cleef & Arpels für alle herausgebracht, denen „First“ zu würzig ist, es richtet sich mehr an die jüngere Generation, da es leichter ist“, hot dui Verkäuferin gmoint. „Wenn Sie etwas ganz Besonderes möchten, testen Sie ihn auf der Haut und geben Sie ihm eine halbe Stunde Zeit.“

Also han i mir des "ganz bsundrige" Wässerle aufsprüha lassa, bin mit meim Häutle wieder zum Lada nausspaziert und han mir dr Wecker gstellt. Noch dera halba Stund han i na mal dr Riechkolba naghoba.... ond han gmoint, i ben wie früehner bei dr Grossmutter in dr Küche, wo se Träublesgsälz gmacht hot. Für älle, wo koi Schwäbisch schwätzed: Träuble send Johannisbeeren ond Gsälz isch Marmelade. A Himbeerle kennt au no neigflutscht sein, aber Mandarinle? Noi, dui send doch eh erscht em Wender reif...! Blümle send mit de Träuble glei mitpflückt worda, dui störed aber net, des passt zu soma Gartadüftle, a klois Vanillestängele no... abr des Patchouli isch en Furzklemmer, des traut sich net so recht, isch abr au gut so.
Dui Grossmutter, wo des Parfüm gmacht hot, hot zwar ganz feine süsse Träuble verwendet, bloss hot se glaub dr Zucker mit em Salz verwechselt. Des hot na a Gschmäckle... ihr däted saga „gourmand“, bloss ebä a salzigs Gsälz. Es isch a bissle gwöhnungsbedürftig, mr vrschtohts et glei, abr es isch fei net schlecht. Abr dui „jüngere Generation“, wo des traga soll, mecht i also säha! Soviel Mut hend doch dui heutzutag gar nemmeh!
Trotzdem: s Gsälz von meiner Grossmutter hot länger ghoba, net bloss drei Stündle... abr so scheene Töpfle hot se net ghet!